محركات فولفو T4/T5 بمثابة كوابيس لأصحابها

 

الحكاية مؤلمة من البداية …. سيارات الأحلام تتحول الي كوابيس تطارد أصحابها في منامهم ويتحول النهار الي ليل مظلم دامس وتختفي البسمة من علي الوجوة وتنزلق قدم صاحبها الي سراديب خيبة الأمل وفقدان الثقة في القريب والغريب فهو يسمع كلام في كلام أما الفعل والتفعيل مالوش مثيل كلة بيلف علي كلة والمصلحة فوق الجميع والمصالح تتصالح … ومن غير كلام كتير تعالوا نشوف الأستاذ وائل واللي جرى لة من غير تزييف إتفضلوا معانا؟؟!!

الأستاذ وائل كامل بيحكى حكايتة وكلة ألم وبيقول انا اشتريت عربية فولفو S60 موديل 2011 و طبعا قبل ما اشتريها كل الي اعرفهم شكروا في الفولفو جدا . بس للأسف طلع اكبر مقلب أخدته في حياتي العربية للأسف غيرت موتور و فتيس وعلبة دريكسيون ده غير انها اصلا كانت مغيرة موتور و فتيس قبل ما اشتريها.

تخيل انك تكون ماشي بالعربية و بدون أي مقدمات تلاقي رسالة check engine تروح التوكيل تكشف يقولك العربية جابت موتور .

انا واحد ضمن مجموعه مكونه من اكثر كم ١١٠ فرد اتعرفنا علي بعض وًقررنا ما نسيبش حقنا لأننا حاسين ان فيه غش تجاري واضح . كلنا عربيتنا فولفو محرك T4 وبعضنا t5 موديلات من ٢٠١١ ل 2015 . مننا اللى غير موتور وفتيس اكثر من مرة وبعد شويه يعطل مِن غير سبب

ومننا  من طلب منة أنه يحط بنزين ٩٥ و بيريح العربية في الإشارات وكل الكلام اللى الوكيل بيتحجج بيه وما فيش فايده .

المأساة كمان انها طلعت مش حاله فردية انا اتعرفت علي أكتر من 110 شخص عندهم نفس المشاكل ومنهم الي مغير موتور ثلاث مرات. أعتقد فيه ناس كتير مش مصدقه بس فعلا ده الحقيقة.

و التوكيل رافض يقتنع انها مشكله في التصميم او التصنيع وانه يرجع العربيات المعيبه ويوقف بيع العربيات الجديده الي فيها نفس نوع المحرك.

عملنا شكاوي في حكاية المستهلك و مجموعه مفوضة قابلت رئيس الجهاز و قابلت مجموعه من الوكيل و بعتنا ايميلات لفولفو وتقريبا وصلنا لطريق مسدود في التفاوض بسبب رفضهم الاعتراف بوجود عيب في تصميم المحرك ومصرين انها مشاكل فرديه مع ان عددنا كبير جدا و كل يوم في ذيادة احنا مش عاوزين مد الضمان أو تغير المواتير و الفتيس لان ده جربناه و محلش المشكلة . احنا عاوزين استرجاع كامل للعربية ووقف بيع العربيات اللى من نفس نوع المحرك لان فعلا ده غش تجاري .

يعني لو حضرتك ضمانك ٣ سنوات و اتمد ل ٦ أو حتي ١٠..وحصل مشكله هندفع اكثر من ثمن العربية علي شان تتصلح . مع انه مش عيب استخدام بدليل العدد الكبير  و لو فيه عيب صناعه أو تصميم ده ملوش علاقة بالضمان ولا عمر افتراضي . لازم يحصل استرجاع عندنا كشوفات بالحالات كلها و المشاكل الي فيها وانا واحد عربيته مغيرة موتور و فتيس مرتين و علبه دريكسيون مرة و لو حبيت أبيعها لازم احكي مشاكلها من باب الامانه . فأكيد مش هتتباع .

الأستاذ ناصف محمد قال .. انا عربيتي الفولفو S60 عاملة اقل من 70،000 كيلومتر وجابت موتور !!! مانصحكش ابداً ابداً تغلط غلطتي !!! الحمد لله

المهم بعتنا كلنا ايملات لشركة فولفو في السويد و عملنا شكاوي جماعية في حمايه المستهلك و للأسف مش عارفين نأخذ حقنا .. حسبي الله ونعم الوكيل و ان شاء الله نتحاسب في الأخرة و نأخذ حقنا

تعليقات فيسبوك

أكتب تعليقك