بيجو وحش فرنسى بأسنان لبنية.. تاية بين حماية المستهلك واللجان الفنية ؟!

أسماء كبيرة ورنانة وعلى حاجات بسيطة وبالإستهانة وتكبير الدماغ وعدم المتابعة ومراعاة شعور العميل ووقتة وظروفة.. تأتى المشاكل وتضيق الصدور وتعلو الأصوات الحناجر لأنة من المتعارف علية أن الوكيل هو المسؤل الأول عن راحة عملآؤة اللى وثقوا فية ووضعوا كل مدخاراتهم وتحويشة العمر وشقى السنيين فى سيارة هو مستوردها أو مصنعها وفى ظل الظروف الصعبة التى يمر بها الإقتصاد كان لابد من المصارحة وأن يكون هناك شفافية ووضوح بين الوكيل وعميلة أما إذا كان غير قادر على توفير المركبة المناسبة وصيانتها وقطع غيارها فهذا شيء أخر ليس لنا شأن بة فهو شأنهم مع عملائهم لآن العملاء في إستياء ؟؟!! ونقولها لسنا معاً أو ضد تلك أراء المجربين بدون تهليل أو تطبيل ؟؟؟؟!!!

الأستاذ محمد زكى أنور …  يروى قصتة المؤلمة بعد ما شاف الموت بعينة هو وأختة ويقول …القصة كلها بدأت في يوم 14/5 كنت نازل انا و اختي السويس على الطريق بعربيتى البيجو 301 موديل 2015 ماشيه 36 الف كيلو و هي لسه في الضمان و قبل ما نعدي البوابه بتاعت السويس بحوالي 7 كيلو فجأه فقدت السيطره على العربيه تماما و دخلت في مصده اسمنتيه الي ادى اني اتقلب و العربيه تزحف على ظهرها في نص الطريق , لحد هنا و مكنش فيه اي مشكله و الحمد لله طلعت انا و اختي من العربيه و طبعا قدر الله و ما شاء فعل و قولت الحمد لله بس بعدها اتفاجأت ان نظام التعليق للكواتش الامامي شمال الي هو ناحية السواق مرمي قبل العربيه بحوالي 10 متر و بعد ما الناس وقفت لنا و الحمد لله العربيه اللي كانت ورايا كانت بعيده عني مش بكتير بس لحق يهدي و نزلي و سألته عن اللي حصل قالي انه شاف ان الكاوتش الي ناحييتي ده انه طلع يجري و بعد كده انا اتقلبت ؟؟!

مع العلم ان اللي مشيوا في طريق مصر السويس لا فيه مطبات ولا طوب ولا اي حاجه ، يعني الطريق نضيف فطبعا ان الجزء ده يتخلع كده بدون اي سبب فهو يعتبر مشكله في حد ذاتها و اكتشفت ان ديه مش اول مره تحصل في البيجو 301 بنفس السيناريو و طبعا فيه عربيات تانيه حصلتلها نفس الحكايه و كنت نزلت البوست و ناس قالت ان الكاوتش فرقع و ده الي خلاني اتقلب ؟؟!!

المهم اني بعدها باسبوع بعد ما فوقت من الحادثه و سألت عن الإجراءات الي ممكن اخدها لان مش طبيعي ان نظام تعليق كامل يتخلع من مكانه من غير اي سبب لان لو حضرتك مشيت على طريق مصر السويس فهو لا فيه مطبات ولا طوب ولا اي حاجه و الطريق نظيف ؟؟!!

روحت بعدها باسبوع للتوكيل و طبعا لقيت معامله جافه من مدير العلاقات العامه و وقتها بلغني انهم هيبلغوا مركز الخددمه و يشوفوا هيبقى الوقت المتاح امتى عشان ياخدوا يكشفوا على العربيه و كنت وقتها رحتلهم الخميس ؟؟!!

قالي هنكلمك يوم السبت او الأحد  بالكتير

لقيتهم بيتصلوا بينا الخميس و قالولنا ان نجيب ونش و نوديلهم العربيه التوكيل , فقولتلهم ان حضرتك اللي لازم تجيب ونش من عندك و مهندس عشان العربيه عالأرض و صعب تترفع و عشان ميحصلهاش اي حاجه ..و طبعا انا رفضت عشان ممكن يحطوا الغلط على النقل . وقتها قالولنا ان ده مش متاح و يا نجيب العربيه يا خلاص على كده ؟؟!!

المهم بعدها طلعت على حماية المستهلك و عملت شكوى و بعدها اتحددت لجنه يوم 6/7 الي هو كان الخميس الي بعد العيد على طول عشان يتكشف على العربيه ..

و الي حصل في اللجنه ان في الاول سألوني عن اللى حصل , قولتلهم نفس الكلام  و بعدين جيه 2 معيدين شافوا العربيه و كشفوا عليها و العربيه مرفوعه عالونش و طبعا كان فيه تعليقات ما بين ممثلين بيجو و المعيدين.بغض النظر عن ده,جيه الدكتور ابراهيم بعدها دكتور في قسم السيارات في جامعة عين شمس شاف العربيه و عمل فحص على كل حاجه و بعدين جيه اخر شخص و هو الدكتور محمد عبد العزيز رئيس قسم السيارات في الجامعه و في الاخر جيه حد من شركة بيجو عشان يحاول يطلع البيانات من الكنترول يونت لقوا ان الضفيره فيه مشكله و الجهاز مش قاري فمقدروش يطلعوا البيانات من الكنترول يونت. بعد الفحص (بأختصار )
جيه الدكتور ابراهيم و الدكتور محمد عبدالعزيز كلموني و كان معايا والدي فروحنا معاهم و قعدنا عشان نفهم الي حصل, الدكتور محمد عبدالعزيز بدأ كلام و كلمني شويه عن ان اي حادثه بتحصل نتيجه لعدة احداث متتاليه و هكذا ..
الكلام كالأتي .. ان الجزئ الامامي شمال ده فعلا انفصل عن العربيه و هي ماشيه و فعلا العربيه مشيت على 3 كاوتشات و لفترة كمان و بعدها حصل الي حصل الاصدام و انقلاب العربيه و الكلام ده كله .. طيب ايه السبب؟ .. كان نتيجه ان الجزء ده خبط في جسم صلب زي طوبه مثلا …بمعنى ان الكاوتش ده خبط في طوبه فالسيستم ده كله خبط في جسم العربيه من ورا و رجع طلع جري بره العربيه – غطا البطاحه فعلا معووج- بمعنى انه خرج من مكانه متخلعش
سألت الدكتور : طيب هو مش يمكن يكون الكاوتش فرقع و هو ده كان السبب و الجزء ده اتخلع بعد ما خبطت في المصده ؟
رد الدكتور انه لا لو الكاوتش فرقع مكنش هيبقى القطع بالمنظر ده , و ان لا برده الجزء ده متخلعش من الخبطه
فضلت أتكلم مع الدكاتره بنحاول نفهم نتيجة الفحص ديه ,يعني الناس الي مشيت في طريق مصر السويس , عارفين كويس ان الطريق نضيف مفيهوش لا طوب ولا غيره ,فالدكتور قال انه ميعرفش هو بيقول بس انها ممكن تكون طوبه , فافترضت معاه ان ماشي الجزء ده خبط في حاجه , فهل ده معناه ان الجزء ده يتخلع و يطلع يجري من العربيه ؟؟!!!
كان رده ان ميقدرش يعرف لان ده بيندرج تحت حاجه اسمها   Safety Protocol بتاع الشركه و ممكن يكون هو ده ال Safety Protocol بتاعها و لما سألته هو ياترى ده فعلا ال Safety Protocol قال انه ميعرفش و ديه بتبقى حاجه خاصه بكل شركه مش اي حد يعرفها , ان ممكن اه لو انا ماشي بالعربيه و الكاوتش ده خبط في جسم صلب انه احسنله يتخلع – يعني العربيه تمشي على 3 احسن و ئأمن للسواق- …

المهم ان الدكتور كان بيقولي الكلام ده كله عشان ده يعتبر مش عيب تصنيع ان السيستم كله يتخلع من مكانه نتيجه لخبطه فيه ,فده مش عيب تصنيع و لما اتناقشت معاه على انه مش من المعقول اني اكوون مااشي بأي عربيه ايا كانت نوووعها و لو خبطت في بلاااعه و خلينا نقول ان طولها متر و طلعت فوقيها بالكاوتش ان من المعقول ان الجزء ده كله يتخلع , يعني ممكن نقول ان مقص يتكسر او كاوتش يفرقع , وقتها يمكن يكون فيه تصرف للموقف و الواحد يقدر يسيطر عليه , لكن العربيه تمشي على  3عجلات  فديه حاجه مستحيله يعني .. و طبعا مكنش فيه رد غير ان ده مش عيب تصنيع ,و ميقدرش يكتب في التقرير انه عيب تصنيع , و بعد مناقشه توصلنا ان ده مش عيب تصنيع لكن عيب الديزاين في الاخر طلبت من الدكتور ان بعد اذنه الكلام الي اتقال ده يتكتب و يتكتب ان الجزء ده اتخلع عشان خبط في الطوبه و بس
ملحوظه: الدكاتره جابوني و يكلموني لان من وجهة نظرهم ان التقرير مش في صالحي و ان ده مش عيب تصنيع

بعدها فضلت مستني حد من خدمة حماية المستهلك يكلمني لان التقرير بيقعد من 3 اسابيع ل 4 عقبال ما يروح لحماية المستهلك , المهم فضلت مستني و محدش كلمني فروحتلهم يوم 10/8 و اتحدد معاد الجلسه يوم 22/8 عشان يتقال الي اتكتب في التقرير لان اللجنه طلبت انها ترجع تفحص العربيه تاني عشان فيه معلومات ناقصه سرعة العربيه

روحت يوم 22 و اتعمل الاجتماع و للأسف كانت الصدمه ان المهندس بيقرا و كل الي اتكتب فيه ان الجزء الي اتخلع ده مش هو المسبب للحادثه و ان ده مش عيب تصنيع فقط لا غير و ان التقرير كده مش في صالحنا
من غير ما يتكتب فيه لا موضوع الطوبه ولا Safety protocol
ولا اي حاجه من الي دكتور قالها : )) مجرد انه مكنش المسبب لان في اغالب لجنة الفحص شايفه ان الطوبه هي السبب )
و في الاخر خالص اتكتب ان الشاكي الي هو انا اعترضت و قولت ان ممكن يكون ده عيب ديزاين و هما ميقدروش يتأكدوا

هو للأسف رفضوا اني اخد نسخه من التقرير و قالوا اني لازم اخده بطلب من النيابه عشان ان كلام اللجنه كان ان فعلا الجزء اتخلع و العربيه ماشيه ؟؟!!

و طبعا في نفس الجلسه لما المهندس قالي ان التقرير مش في صالحي انا الحقيقه انفعلت و سألته اذا كان هو متابع قصة الحادث فهو انفعل و قالي مصحش اللي بقوله فقولتله اني مقصدش اي اهانه بس التقرير مش موضح أي حاجه ولا حتى ان فيه نظام تعليق كامل اتخلع من مكانه و فبعد ما اللجنه كانت بتحاول تاخد قرار طلعنا انتظرنا 5 دقايق و رجعنا و وقتها لجنة عين شمس مكنتش قايله القرار النهائي ليها لأن معندهمش المعلومات الكامله و ده لإن دايرة الكنترول بتاعت العربيه كان فيها مشكله و مش عارفين يخرجوا البيانات من الكنترول بتاع العربيه و المعلومات ديه عباره عن سرعة العربيه الي مسجلها الكنترول ؟؟!!

بس انا اعترضت الحقيقه لان السرعه ملهاش اي دخل بمنظومة التعليق المخلوعه بس هما اصروا و وقتها اللجنه أمرت التوكيل بانهم ياخدوا العربيه و يصلحوا الكنترول و يطلعوا البيانات منه و يسلموه للجنة عين شمس عشان تكتب التقرير النهائي بس و سلمناهم العربيه الكلام ده كان في اخر شهر 8 الي فات

و لحد النهارده مجالناش رد من حماية المستهلك و روحتلهم يوم 17/1 الي فات كان يوم الاربع و قالولي ان لسه مجالهمش التقرير من جامعة عين شمس و هما بعتلهم رسالتين استعجال بس فانا منتظر التقرير بتاعهم

و بالمناسبه انا بدرس هندسة و فيه جزء انا بس محكيتوش اني اتكلمت مع المهندس محمد عبد العزيز و تناقشنا في ايه تعريف عيب صناعه و الحقيقه ان ردهم لو عربيه معموله من الزجاج و ماشيه في مصر فده بالنسبالهم مش عيب صناعه و لو عاوزين نحاسب حد فنحاسب الدوله انهم نزلوا حاجه فيها عيب خطير زي ده عشان كده توصلنا ان ده عيب تصميم ؟؟!!

تعليقات فيسبوك

أكتب تعليقك