مقولة إستعمال طبيب .. مكسب أم مقلب

تطالعنا الإعلانات المبوبة عن بيع السيارات بعبارات فكنوشية لولبية محشية جوز ولوز ومهلبية منها تجد سيارة للبيع بمواصفات كذا وكذا ومن ضمنها  الإعلان عن سيارة  إستعمال طبيب .. فهل يقصد إنها إستعمال خفيف يعنى من المستشفى للبيت للعيادة والعكس وتجد كثير من الناس بتجرى وتلهث لشراء تلك السيارة على إعتبار أن الدكتور راكن سيارتة فى العناية المركزة لتلقى كل العناية والرعاية من فيتامينات وخلافة .. ولكن معروف للكل أن الأشخاص تختلف عن بعضها البعض بغض النظر عن المهن فتجد شخص محافظ بطبعة وأخر مهمل .. ولكن يبقى السؤال ماذا يقصد بإستعمال طبيب . يعنى مش متهانة وإنة مقتدر ماليا وصارف على السيارة ولكن هناك شيء غريب ومحير وكأن هذة الفئة هى الوحيدة اللى بتحافظ على العربيات والباقى مابيعرفوش يسوقوا ومابيحافظوش على أي حاجة وخاصة عربياتهم وتوجهنا الى مجلس قعدة سيارات لنتبادل الحوارات ونسمع الأراء لنضعها بين أيديكم

الأستاذ أحمد بكار قال .. ولا اي حاجه .. اشتغالات واي كلام بيتقال .. يعني الطبيب ده كان شوماخر

الأستاذ  شريف حبيب …بيقول يعنى استعمال بسيط و راقى خالى من الدريفتات و الخمسات و التهور بصفة عامة ، يعنى صيانة منتظمة و التزام القصد استعمال نضيف

الأستاذ تامر عبد الباسط … قال يعني عربيه مبيتصرفش عليها غير لما تعطل بس ويدوب المصروف عشان ينفع تمشي والزبون بعد كده يعرف انها عربية طبيب يبقى فرحان بيها ويصرف عليها دم قلبه   

الأستاذ عمرو وجية … قال بينزل بيها كل اسبوع يعملها فحوصات وتحاليل في معمل الفا وبيعقمها قبل كل مشوار ولو لبس مطب لاقدر الله بيديها مسكنات عشان العفشه

أبو أدهم … بيقول الطبيب ده إنسان راقي لا يشرب ولا يأكل ولا يستهلك بنزين وبيسوق العربية من غير ما يدوس فرامل خالص.. ده غير إنه بيكشف بالسماعة على الكبوت كل يوم الصبح قبل ما يطلع بيها.

الأستاذ مصطفى حبيب .. قال طريقة أسفلت ومن البيت للمستشفى وحياة زي الورد .. وعايش في التكييف . هما الدكاترة كده .. وكشوفات غالية في خمس دقايق  .. لكن اهرب من عربيات المهندسين لا هتلاقي عفشة ولا مساعدين ولا صالون هتلاقيها ملاكي اتحولت لنص نقل 4×4  او مدرعة تداخل سريع.

الأستاذ محمود سعد .. قال .. دلوقتي مفيش اكتر من مشاوير الدكاتره غير الي مبيعرفش يسوق وطالع خمسين الف رصيف ومدغدغها من تحت

دكتور تامر عبدالرحمن بيقول .. انا طبيب وبقول إن  استعمال طبيب يعني حركه كتير استهلاك كتير مافيش وقت لنضافه العربيه الا لو حد بيغسلها يومي ذي البواب او سايس او غيره .. بس في المقابل الصيانه والتصليح في التوكيل او مركز صيانه معتمد واللي بيقولوا عليه بيتعمل لان مافيش وقت ولا صبر للتجربه في الورش في الشوارع..

الأستاذ محمد القماش بيقول … مين قال ان استعمال الطبيب دي ميزة ؟!!  العربية بتكون عاملة كيلوات كتيييير بسبب شغله مش في مكان واحد .. العربية فيها هدومه و شغله و بواقي اكل في السكة و هي ظروف شغله كده مش عفانه منه .. بيجري يترزع في مطبات علشان يلحق مواعيده .. و الانيل عربية طبيب تسويق الادوية

الأستاذ ياسر علام قال ,, يغلب علي الاطباء الهدوء و السكينة لطبيعة المهنة مما يعطي انطباعا بقيادة هادئة متزنة مما يشير الي سلامة السيارة من اضرار سوء الاستخدام

الأستاذ أحمد العشماوى .. قال واخده كل التطعيمات و في الخبطات بتاخد خياطه تجميله

الأستاذ أشرف إبراهيم بيقول .. اسوء حاجة تشتري عربية استعمال طبيب او استعمال سيدة

الأستاذ محمود قناوي قال .. شوف انا اخويا دكتور والله والله اغلب الاطباء ملهمش في السواقة نهائي اكتر ناس بيخبطوا العربيات واكتر ناس منفعين السمكرية وبتوع الدوكو  ولو هتشتري عربية وعرفت انها استعمال طبيب ابعد عنهااااااا

الأستاذ علاء دهشان بيقول .. علي فكره اسوء عربيات استخدام طبيب واستخدام سيدة او عموما الناس اللي مش فاهمه في العربيات وبتسوق وخلاص كده والعربيه بتطلع من تحتهم فعلا متهانه

الأستاذ محمود عبد العظيم قال .. كفاية انك بتاخد منه العربية عمرها ما يجيلها برد … تطعيمات في مواعيدها  واتحدي حد اخد عربية من دكتور جالها برد

دكتور أحمد عبد الصبور بيقول .. على حسب سن الطبيب نفسه لو اكبر من ٤٠ سنة خدها هتبقى العربية تقريبا ما بتتحركش فى اليوم ٣ كيلو. و لو طبيب شاب ما تاخدش منه اصلا عربيات لانه بيفرك بيها زى النحلة . وبكدة شكراً فهمنا يعنى إية إستعمال طبيب ؟؟!!

تعليقات فيسبوك

أكتب تعليقك