كينبو وحش بأسنان لبنية

رحلة شراء سيارة زيرو أصبحت رحلة معاناة تبدأ حكايتها من المعرض تروح ومعاك الأولاد علشان يختارو معاك الألوان تعلوا  وجوههم علآمات الفرحة والسعادة وبعدها تبدأ في رحلة الأحلام الفضائية . من المتعارف علية أن الواحد مننا بيشتري العربية الزيرو علشان يرتاح وينسى وجع الدماغ يعني ينزل الصبح يسمي الله ويضرب المفتاح في الكونتكت ويتوكل علي الله ولآ يفتح كبوت ولآ أي حاجة إللآ في مواعيد الصيانة أما إنك تفاجأ بأصوات غريبة ذي زنة وونة وتزيق … إلخ هنا بقى العكننة علي أصولها الي أن يكرة الواحد نفسة واليوم اللي إشتري فية العربية ما تيجوا نشوف كلام المجربين فهو خير دليل بدون تطبيل ولا تهليل ؟؟!!

الأستاذ ماجد يوسف غطاس مقيم بالغردقه الدهار الوفاء امام الشهر العقارى القديم يروي قصتة مع سيارتة الفضائية وإنهيار أحلامة الوردية على حطام العربية وبيقول ….   امتلك عربيه كيمبو اس 3 مشتريها من توكيل بودى كار فرع الغردقه بتاريخ يوم 25/6/2015 موديل 2016 واستلمت الورق بتاعها يوم 3/7/2015 ورخصت يوم 4/7/2015 … اولا العربيه انا اشتريتها بى 123 الف جنيها كاش عشرين مقدم حجز واول ما استلمت العربيه يوم 25/6/2015 دفعت 103 الف يوم ما استلمت فاتوره العربيه والافراج كانت الفاتوره طلعها 112500 جنيها يعنى كان فى فرق 10500 جنيها عن اللى دفعته …

وكان اول حاجه سألت على الصيانه هنا ولا فى مصر قالى لا هنا مركز الصيانه خلف فرع البيع وشغال على طول مش مواسم وقولتلهم لأن لو الصيانه فى مصر انا مش عايز العربيه  أكدولى أن   الصيانه هنا فى الغردقه …

وفى يوم 12/7/2015 جات من مصر صيانه الف كيلو وقالو هما مسافرين فا علشان كدها لازم تعمل الصيانه قولت ليهم انى العربيه لسه يدوب عملها تقريبا 700 كيلو قالى عادى اصل احنا مسافرين ومش عارفين جاين تانى امتى عملت بالفعل الصيانه واعطونى كتاب الصيانه وكتابه الصيانه تمت وتم شحن التكيف بس كتابه انى العداد فى 1740 كيلو ولم سالت قالى دا لمصلحتك علشان لو اتاخرنا تبقى انت عامل الصيانه وعلية عملوا الصيانه اللى هى غيرو زيت ماتور وزيت فتيس وكرونه وشحن التكيف لانى التكيف كان محتاج شحن مش شغال كويس وتم دفع مبلغ الصيانه الى هو حساب ماقالوه 400 جنيها ويدوب بعد ربع ساعه بالضبط الفتيس ظهر فى عضه رجعت للتوكيل تانى علشان العضه وللاسف الصنايعى مصمم انى يقنعنى إن الفتيس كدا طبيعى وزعقت معاه وحصلت مشده كلامية لدرجه انو قالى اصل انت شكلك اول مره تركب عربيه طبعا قولتلة  انت اللى مش صنايعى رد وقالى انا كنت صنايعى فى شركة بى ام دبليو وبعد مازعقت لانى مافيش فايده ومشيت وطبعا كتب على بعض عيوب العربيه اللى على النت منها حساس الماتور ضعيف والصيانه المفروض بكام وايه الى بيتم فيهاوعلى الصدا الى فى الطنابير وعضه الفتيس واكتشفت انى الصيانه بتتعمل بى 275 جنيها مش 400 المهم بعد تقريبا شهر لقيت الفرامل ضعفت رحت لميكانيكى برها خد هواء ليهم وقالى الطنابير دى مصدى ومش متساويه علشان كدها مره تلاقى الفرامل كويسه ومرها تهرب منك طبعا كلمت صاحب التوكيل وعملت خناقه على الصفحه بتاعتهم على النت لحد ما جالى المهندس فايز في صيانه ال 5000 كيلو بتاريخ 9/9/2015 وكانت العربيه عمله تقريبا 7000 وحاجه كيلو طبعا قعد يقنعنى انى الطنابير مافيهش اى مشكله ومافيش حاجه فيها متأكله وانى الصدا دها عادى علشان العربيه بتيجى على مركب فى المياه فا دى عوامل الجو المهم كان في صوت وراء حاجه بطقطق وتزيا طبعا رش اسبرى على عفشه العربيه وراح الصوت ورش اسبرى على عصايه الفتيس علشان العضه وقالى يومين حاتلاقى العضه تروح وكان الباب الى ورها السواق مش بيقفل عادى لازم ترزع الباب قالى انا ممكن اريح الباب زاى كل التوكيلات تقعد تفتح وتخبط فى الباب جامد لحد ما يطبع لكن مش راضى اعملك كدها وسيبه هو هايظبط  لوحده ومضانى على ورقه إنو تم عمل الصيانه والعربيه كويسه وقالى ده اجراء روتينى  وجالى فايز فى صيانه 15الف كيلو بتاريخ 28/10/2015 كانت العربيه عامله 15800 كيلو تقريبا وعمل الصيانه وشحن التكيف تانى وحاول يضيع الصوت الى وراء لكن معرفش وفى الاخر قالى ده من الشنطه وعايزه سمكرى واحنا هنا مافيش سمكرى تعاله الفرع الرئيسى فى كرداسه فى هناك سمكرى وطبعا اتغظت جدا وقرفت من العربيه وركنتها فتره بسبب الصوت الى ورا وجات صيانه ال 20 الف كيلو يوم 30/12/2015 كانت العربيه عامله 21500 كيلو تقريبا  وعاملت الصيانه وبرضو الصوت الى وراء ذى ما هو وعضه الفتيس رجعت تانى وجات صيانه 25 الف وتم عمل الصيانه وشحن التكيف لتالت مرها والصوت وراء ذى ما هو وجات صيانه الى 35 الف فى 6/5/2016 وكان اول مره يجى المهندس هانى والراجل بجد عايز يساعدك ويعملك لك كل حاجه المهم تم شحن التكيف وبالفعل ضايع الصوت الى وراء كان معاه ميكانيكى صنايعى بجد اسمه ابو عمار والراجل عمل حاجات اول مره تتعمل فى العربيه حاجات عمر ماحد قرب عليها وقالى المفروض دى الاساسيات وانا بالفعل شكرت المجموعه يوم 7/5 على النت وفى اخر شهر 5/2016 من ضعف التكيف ركبت عازل حرارى على زجاج العربيه كله متكلف 2000 جنيها بره التوكيل بسب ضعف التكيف وفى شهر 7/2016 كمبروسر التكيف باظ وبلغت التوكيل قالى تلاقى سير التكيف عايز يتشد بالفعل رحت لصنايعى تكيف قالى لا الكمبروسر باظ فى صيانه ال 40 الف يوم 16/8/2016 تم تغير الكمبروسر على حساب الشركه ولكن انا دفعت شحن التكيف بس ورجع صوت الخبط وراء بس اكثر من الاول وعضه الفتيس لسه موجوده وجات صيانه 45 الف وتم شحن التكيف لضعفه والصوت محدش عارف بتاع ايه ونفس القصه فى صيانه الى 50 الف كيلو قى يوم 30/1/2017 تم شحن التكيف تانى والصوت والعضه مازلت موجوده وسالت مهندس فى الشرقيه على الصوت الى وراء قالى هات جاز على زيت ورش بيه العفشه كلها وراء وبالفعل عملت كده ولكن للاسف بدون جدوا ومن صيانه 55 الف هنا بدات المشاكل اتصل بى المهندس فايز قبل ما يجى علشان يقولى انا جاى يوم 15/4/2017 علشان اعمل صيانه  وحاليا بنركب كاميرات خلفيه تحب تركب سالته بكام قالى 700 جنيها قولت  ماشى بعد كدها اتصلت بيه قولتله   يمكن الصوت اللى عندى من المساعدين بالفعل قالى ممكن  قولتله  بلاش كاميرات وهات مساعدين علشان لو كان العيب فيهم نغيرهم احسن من الكاميرات و  قولتله  يعنى لازم تيجى ليله العيد  ماشي  هاستناك مخصوص بالفعل كان يوم 15/4/2017 عمل الصيانه وكشف على المساعدين الخلفين وقالى بايظين ولازم تتغير وتم بالفعل تغير المساعدين على حسابى كان يوم السبت المهم التكييف ذى ما هو وحش والعضه بتاعت الفتيس موجودها ولكن الصوت الى وراء راح يوم الثلاثاء فى نفس الاسبوع الصوت وراء ظهر ولكن اكثر من الاول والعربيه بقيت وراء بتدبدب    فى المشى والمطبات بالفعل كلمت المهندس فايز الى ركب المساعدين قالى لما تنزل الغردقه خلى حماده يرفع العربيه وهات انت اسبرى ورش على المساعدين بالفعل عملت كده لكن العربيه بتتهبد وكدة مش صح يوم 20/5/2017 توجهات الى فرع كرداسه لحل مشاكل العربيه وكنت اول مره اروح قابلت المهندس محمد اللى صلح التكيف وصلح الصوت وقالى العربيه كده تمام قولتلة العربيه مش صح بتتهبد فى المطب قالى لا انت متهيلك العربيه كدها حاتلاقيها تمام المهم يدوب رحت من كرداسه للهرم التكيف باظ تانى رجعتلهم تاني قعدوا العربيه اكثر من ثلاث ساعات شغاله لحد ما المهندس حسن شطا جه كنت اول مره اشوفه مدير الصيانه سال العربيه دى مالها عرف اللى فيها ودخلها جوه وعمل التكيف وجربنا طلع كويس المهم بلغته وقولتله ياريت تكون اخر مره علشان انا بجد تعبت خالص وسافرت يوم 21/5/2017 للغردقه يوم الاحد والتكيف باظ تانى كلمت المهندس حسن وبلغته قالى انا حابقى اشوف الحكايه دى فى شهر 6/2017 اتصل بى المهندس فايز علشان جاى يعمل صيانه ال 60 الف كيلو وهو جاى عمل حادث رحت له فى المركز قاللى مش قادر اعمل حاجه ومسافر النهارده القاهره سالته انا عملت بزيت الفتيس والكرونه 20 الف كيلو ونازل سوهاج اغيرهم بالفعل قالى غيرهم غيرهم زيت موبيل 90 يعنى اقل درجه لزوجه بالفعل رحت موبيل الغردقه اغيرهم لقيت مصيبتين الاول زيت الفتيس والكرونه الى نزل 140 مش 90 اتصلت بالمهندس هانى قالى أة اصل المره الى فاتت مكنش فى زيت 90 عندينا فاحطينا زيت 140 طيب هل ينفع احط زيت 90 بعد ما حطيت زيت 140 قالى عادى وطبعا الصنايعى الى فى موبيل استغرب وقالى ده مستحيل يكون مهندس بيفهم فى حاجه اسمها عربيات على العموم انا حاعمل ذى مانت عايز واحط 90 ثانيا لما حلينا زيت الفتيس لقينا نازل مع زيت الفتيس ذى مسمار مكسور من جوه او صاجه من حاجه مكسوره ولما كلمت المهندس هانى قالى خليها معاك ولما اجى اشوف ده ايه المهم عملت كدها وجالى المهندس هانى فى صيانه ال 60 الف يوم 29/7/2017 وشاف المسمار الى خرج من الفتيس وقالى عادى مافيش اى مشكله وطنش وخليته يحل المساعدين الى ركبها فايز لانى شكك فيها بالفعل فكها لقيتها بايظه قالى لا ده الطبيعى وجابلى اتنين جداد زايهم بايظين قولت سنفر المساعد الى راكب عندى بتاع فايز علشان اخذ الرقم من عليها واجيب زايهم المانى او يابانى بالفعل عمل كدها وتم شحن التكيف يوم السبت فى الصيانه ويوم الثلاثاء باظ التكيف لدرجه فظيعه ولما توجهات للصيانه قالى اصل دوره مياة العربيه فيها هواء راح اخذ الهواء وحط مياه والتكيف زبط يدوب مشيت 30 كيلو والتكيف باظ رجعت تانى قالى لازم تبرد العربيه ونغير المياه كلها قولت ماشى وبالفعل عملنا كدها والتكيف بعدها بقا كويس بنسبه 70% فى شهر 8/2017 كان معى واحد صاحبى نزل مصر اعطيته المساعد الاصلى بتاع العربيه علشان يجبلى ذاية المهم لما جربت المساعد لقيته سليم واحسن من الى راكب قولت احل اللى راكبة  فايز واركب الاصلى اكتشفت مصيبه ثالثه وهى إن المساعد الى راكبه فايز اقصر من المساعد الاصلى بى 3 سم يعنى مش بتاع عربيتى أصلآ مما ترتب عليها لوح شاسيه العربيه وطبعا بلغت المهندس حسن مدير الصيانه قالى حل بسرعه المساعد التانى وركب بتوع العربيه الاصلى بالفعل عملت كده فى يوم 6/9/2017 وانا نازل سوهاج عند مفارق اسيوط سوهاج نورت امامى لمبه اعطال العربيه اتصلت بالمهندس حسن وسألته قالى هل العربيه طفيت او مش ماشيه قولت لا العربيه زاى الفل كل حاجه تمام ومافيش سخونه ولا حاجه قالى خلاص امشى بالعربيه عادى براحتك تلاقى حاجه علقت وراحت المهم وصلت سوهاج بالفعل رغم انه كان باقى اكثر من 70 كيلو واتصلت بيهم تانى وجربت معاهم كم حاجه على التيلفون لحد ما قالو لى العربيه فيها صباب علق سالتهم احمل العربيه واجيبها قالى لا تعالى سايق عادى جدا بس يوم 12/9 علشان دا اول يوم عمل بعد العيد بالفعل نزلت من سوهاج للغردقه بالعربيه 10/9 وبعد كده توجهات لمصر يوم 12/9 لعمل العربيه وكشفوه عليها وقالى فعلآ صباب او اكثر من صباب معلق ومضونى انى موافق على فك وش السلندر وتصليحه ودا اجراء روتينى وقالى سافر انت واحنا لما نخلص حانتصل بيك سفرت بالفعل الغردقه يوم 12/9 ويوم 14/9 اتصلت بيهم قالى احنا حلينا العربيه وبعتنا الوش المخرطه علشان يتعمل وقالى دا عيب بنزين قولتله   انا مش بحط غير 92 وشوف بنفسك التنك قالى احنا عارفين انت قد ايه مهتم بالعربيه لكن العيب من محطات البنزين قولتله لا اظن يعنى مستحيل يكون عيب بنزين والعربيه ماشيه الف كيلو زاى الفل والشكمان بيجيب مياه ومافيش تنتيشه ولا اى حاجه المهم قالى احنا حانعمل العربيه ولما تخلص حانكلمك قعدت أتابع معاهم لحد ما قالى تعالى يوم السبت اللى فات ده استلم عربيتك طبعا سافرت مصر رحت استلم العربيه لقيتهم بيقلولى مش حاتاخد عربيتك غير لما تدفع الفاتوره الى هى 5400 وحاجه طبعا طلعت للمدير العام والمهندس حسن مدير الصيانه وبعد محادثات كتير تم خصم 350 جنيها وتم خصم 910 ثمن المساعدين الى طلعت مش بتاعت عربيتى ولا المساعدين بتوعى بايظين وطبعا اتخنقت معاهم لانى الضمان فين انا العربيه عمله 66 الف كيلو والضمان 100 الف او ثلاث سنوات وانا لسه فى الضمان لم اكمل الثلاث سنوات ولما الضمان يكون مش على الماتور اومال الضمان على ايه وطبعا مدير الحسابات رفض يدينى مفتاح عربيتى قالى ياالدفع يامش حاتشوف عربيتك تانى وطبعا متاكدين انى انا مقدرش اقعد فى مصر لظروف شغلى ومعرفش اوصف المكان الى انا فيه للنجده علشان حد يجي غصب عنى دفعت علشان اخذ عربيتى والمهندس محمد والمهندس حسن قالى احنا حانديك ضمان على الشغل الى اتعمل شهر او ثلاث الف كيلو ايهم اقرب قولتله حضرتك المفروض حد يبلغنى انى العربيه حاتتعمل على حسابك وتتكلف قد كده يا اقبل يا ارفض مش تقولى عملناه ولازم تدقع قالى هما نسيو يخبروك وغلطه منهم بس لازم تدفع علشان تستلم عربيتك

وللاسف صوت الطقطقا الى وراء رجع تانى

التكيف اه بقا كويس بس ممكن علشان يكون الجو دلوقتى كويس المصيبه التانيه انى لقيت الماتور ولا اتفك ولا حصل فى اى حاجه لانى الماتور زاى ماهو وسخ والمعروف انى لما حاجه بتتحل بتركب على نظافه والى اكد لى الكلام دها انى فى حد بعد ما حكيت مشكلتى قال انى شهر 8 الى فات حصل معا نفس المشكله لكن كانت عربيته خارج الضمان وقال لى العربيه جابت صباب وحاتتكلف 3500 ورفض وراح عامله عند ميكانيكى برها طلع العيب من البوجيهات الى راكبها التوكيل ولما حب يرجعهم رفضوا

والتوكيل الباشا بيغير اى حاجه من عنده يعنى انا عمرى ما شكيت من الحراره او المروحه مش شغاله التوكيل غير لى ساعه الحراره وترموستات الحراره من دماغهم علشان الفاتوره تبقا حلوه

يعنى انا دفعت 5000 على الماتور الى المفروض يكون فى الضمان اومال لما الماتور مش فى الضمان يبقا اللى فى الضمان الكلاكس

والفتيس اللى نزل من قلبه مسمار ودائما فى عضه دا  تقريبا قرب يبوظ ولسه فى واحد كان فى الضمان والفتيس باظ وعمله فى التوكيل على حسابه وبرضه زفت

والمساعدين الى الباشا ركبهم غلط ومش بتوع العربيه ولوحه الشاسيه والتوكيل قالى لا مافيش حاجه عادى ماحصلش حاجه

انا بالفعل قدمت شكوه فى حمايه المستهلك يوم 26/9 رقمها 699273 عن طريق النت ويارب اخد حقى  ( وحسبي الله ونعم الوكيل في وكلاء باعوا الوهم للعملاء )

تعليقات فيسبوك

أكتب تعليقك