من يحمي العملاء فى مراكز خدمة الوكلاء

نعم الحفاظ على القمة أصعب من الوصول إليها كلام سليم ولكن عشاق الفئة الألمانية حائرون تائهون يفكرون هل هذة هي خدمة ما بعد البيع لسيارة من سيارات الفئة الأولي سمعة وتاريخ وأموال مدفوعة بالألاف ولكن ما يحدث شيء مؤسف بكل المقاييس لآ ترضى عنة الشركة الأم ولآ الموزع الحصري يا سادة ما يحدث في مراكز الخدمة من تهاون وتراخي وإستهتار بالعملاء يجعلنا نقول للموزعين إذا أردتم أن تحققوا نسب مبيعات وتجنوا الأموال وكلة يبقى على تمام يبقى لآزم  نصحى ونفوق ونسعى جاهدين بكافة السبل لإرضاء العملاء ومن غير كلام كتير تعالوا نشوف شكوى أحد المجربين من غير رتوش ولا تننتيش ؟؟؟!!!

الأستاذ أحمد حرارة بيحكى حكايتة مع وكيلة يعنى بيت العربية  اللى المفروض يلاقى فية كل الأمن والأمان وبيقول …  أدخل توكيل فولكس عشان اغير إكصدام ،،، أخرج بفتيس نصه مسروق ومتغير بحاجات مستعملة … أنا بكتب الكلام ده علشان أحكي اللى حصل معايا جوة توكيل فولكس أبو رواش.,, أنا عربيتى جيتا 2010 فتيس 7 سرعات 1600 سي سي. دخلت التوكيل عشان اغير إكصدام أمامي وزجاج أمامي وبعد ما عملوا المقايسة المبلغ كان كبير جدا 71000 زودا فانوس وصدر تقريبا المهم التكلفة كبيرة فقولتلهم انى هستلم العربية من غير ما تتصلح .روحت فى الميعاد اللى قالوا عليه عشان استلم العربية اتفاجئ بالمهندس اللي استلم مني العربية يقولى ان العربية مش عايزة تدور. مش عارفين يدوروا العربية و مش عارفين يحددوا العطل!!!ايه اللى دخل تغيير إكصدام بالكهرباء بتدوير العربية ؟؟

المهم فضلت في التوكيل لحد موعد نهاية العمل 5:30 مساءا وقالى المهندس انهم مش عارفين المشكلة فين و هيكملوا شغل فيها اليوم اللى بعده… روحتلهم اليوم اللى بعده ونفس الكلام متغيرش، وحاولت اقابل المدير بس قالولى أنه في إجتماع برة الشركة.

وفضل الوضع زى ما هو أربع أيام ، رابع يوم روحت قالولى أن العربية جاهزة !!!سألت العطل كان من ايه ،قالولى انه مشكلة في الكهرباء بسبب فيوز الميكاترونيك وغيروا الفيوز والعربية بتدور دلوقتى.

أخذت العربية وخرجت بيها وأنا شاكك فى اللى حصل وانا ماشى بالعربية بدا يحصل برجلة فى الفتيس و الموضوع عمال يزيد مع المشى .. روحت اكشف علي العربية في مركز صيانة محترم وقالى ان التوكيل غير الميكاترونيك بواحدة تانية مستعملة وممكن تكون شبه تالفة بتاعت عربية 1400 تربو والسوفت وير اللى عليها مختلف عن السوفت وير بتاع عربيتى وعشان تشتغل الميكاترونك راح التوكيل غير ترس الفلام بترس تانى مستعمل خاص بالعربيات 1400 تربو عشان يشتغل مع الميكاترونيك اللي ركبوها.

وانا معرفش ايه حالة الأجزاء اللي ركبوها في عربيتي هل هي سليمة ولا شبة تالفة ؟ خصوصا ان فيه مشاكل كتير في الفتيس ده وكتر تغييرالأجزاء ديه . ممكن تكون أجزاء شبة تالفة اتفكت من عربية تانية لتغييرها… وفين الأجزاء الخاصة بعربيتي ؟ ياتري سرقوها وركبوا أجزاء فيها مشاكل أو أعطال ؟ وازاى

تعليقات فيسبوك

أكتب تعليقك