إسأل مجرب ولا تسأل وكيل .. في مراكز الخدمة بختك ياأبو بخيت

الهدف الأساسي والذي من أجلة أقيمت مراكز الخدمة ظل يتمثل في تأدية خدمة متميزة لمالكي السيارات التي تقوم شركاتها بتسويقها ومن الطبيعي أن يسأل العميل عن خدمة مابعد البيع وهل هذة السيارة تتمتع بسمعة طيبة من خلال القائمين علي صيانتها وهل قطع الغيار متوفرة وطاقم الصيانة قادر علي التصدي للعيوب التي تظهر من خلال مراحل التشغيل أم لا .. وهنا يكون العميل مطمئن على سيارتة لأنها في بيتها مش عند الأسطى بلية والسيارة مرمية في الشارع  وهنا كثرت الأحاديث والأقاويل عن المشاكل التي يتعرض لها العملاء في مراكز الخدمة وإليكم بعض من أبخرة وغليان مما في صدور العملاء ؟؟!!

الأستاذ محمد محمود بيحكى قصتة وفي صوتة مرارة وألم  وبيقول  ….. دا يا جماعه التوكيل و مركز الصيانه الرسمي لسيارات ( فولكس ڤاجن ) ( أودي ) ( سيات ) ( اسكود  ) !!

مركز الصيانه المعتمد بتاعهم ( التوكيل ) فرع ابو رواش …من حوالي أسبوع اتصلت بيهم عشان صيانه العربيه المعتادة .. وبالفعل قالوا تعالي يوم الجمعه الموافق ٤/٨/٢٠١٧ .. وبالغعل روحتلهم .. و بعد الاتفاق قالوا صيانه ألعربيه هتكلف ٩ الف جنيه قولت موافق مفيش مشاكل … فوجئت بمكالمتهم ليا في حوالي الساعه ٣ عصراً .. وقالوا ( ألعربيه جاهزه حضرتك تقدر تيجي تستلمها )..

بعد لما روحت عشان استلم الصيانه .. وجدت المهندس الذي استلم مني العربيه بيقول .( لو سمحت عايزينك تشوف حاجه كده في قسم الصيانه تحت ) .. وبعد لما نزلت قسم الصيانه .. قال ( العربيه اتخبطت) !!!!

ومن هنا تبدأ المأساة … ايتديت معاهم مفاوضات  اني رافض تماما فكره انها تتصلح لان الخبطه اللي في العربيه وصلت الي ( عظم ) العربيه يعني ببساطه العربيه اصبحت بلا قيمه .. وطلب منهم سياره نفس موديل عربيتي 2014 .. ولكن الطلب اترفض من جانبهم .. بحجه ان مفيش الموديل دا خلص .. قولتلهم خلاص ادوني الموديل المتاح .. كل هذه المفاوضات انتهت بالرفض من جانبهم !! .. و بعد مفاوضات مطوله مع الشركه دي … اضطريت اني اعمل محضر إثبات حاله بالواقعة .. وبعد مفاوضات اخري في حضور ظابط قسم كرداسة و هو شاهد علي كلامي .. اتفقت مع  الاستاذ ( وائل ديسوقي ) ..مدير خدمه ما بعد البيع علي حد قوله .. علي استكمال المفاوضات يوم الاثنين .. نظراً لان الشركه كانت هتقفل في الخامسه مساء…. المفاوضات كانت عباره عن ان الناس في الشركه هيقيموا سعر العربيه و انا هدفع فرق فلوس ليهم علي الرغم اني كل دا مليش اي ذنب فيه .. كل دا في مقابل اني اخد عربيه موديل 2017 .. بعد ما الناس قيموا سعر العربيه بتاعتي رغم اني عامل كل صيانتها في توكيل من يوم ما اشتريتها عرضوا عليا 250000الف !!.. علي الرغم ان العربيات اللي نفس الموديل معروضه في مواقع معتمده زي ( OLX ) و ( contact car ) ب حوالي 410000 الف …. ودلوقتي العربيه عندهم و و انا رافض تماماً فكره اني استلمها .. لاني ببساطه داخل التوكيل بعربية جديده و فبريكه .. و هما عايزين يخرجوا العربيه و هي ( معيوبه ) … واعتقد ان الصور اللي في البوست بتوضح اني مش بفتري عليهم …  . وعشان كل واحد بعد كده يعرف حقيقه توكيل ( فولكس ڤاجن ) في مصر !!!

ولكن يبقي السؤال ( هل لو الواقعه دي حصلت في اي بلد في العالم .. كان هيحصل كل دا ؟ )حسبي الله و نعم الوكيل ؟؟؟

تعليقات فيسبوك

أكتب تعليقك